2008年最後一篇文章

原來...呢個blog 係2005年開始寫...已經寫左6百幾篇日記...日子一日一日o甘過....今日已經係2008年既最後一日...我無出街...其實解釋都只係得一個...因為無朋友約我...

2008年既最後一日..番工既時候覺得個心唔舒服...唔舒服已經唔係第一次...間唔中有一日就會覺得un 住un 住又呼吸唔係好順...不過呢D都係小事..或者係轉天氣突然變凍有影響掛......嚴重既試過有2次...直頭辛苦到好似透唔到氣...個心口好痛...不過之後睇醫生醫生又話無問題...所以我諗...可能將來有一日我嚴重到入醫院就會知道係o羊事喇~

2008年對我黎講唔係好既一年...有好多自己帶黎既煩惱...好多野諗唔通諗唔明....有D事由明明好明變到唔係幾明....由明明無野變到好鬼驚......或者人大左係會諗多D...諗遠D...

我諗2008年最值得高興係胡小寶既出現...佢令我地多左好多歡樂...每一個星期睇住佢成長... 我發現原來我地家庭裡面每一個人其實都一樣成長中

唔駛講當然係家姐同姐夫.. 照顧一個小朋友的確唔簡單...由初時既騰雞到家下好成熟o甘處理小寶既每一件事....其實家下每一次見到家姐真係做左人媽媽...我覺得佢真係“大個女”左好多同好不可思議...cymbals... maracas...tambourine...你知唔知係o羊呢...咪就係小寶平時反緊既玩具樂器名lor...小寶床邊個張A-Z 海報裡面既生字...有D 我都唔識得讀呀~~我真係好想8下家姐最近駛唔駛開始扲本字典查生字呢﹖XDD

我阿爸....因為賓賓(即姐姐) 唔係好識得聽/講中文...結果佢每一次去見小寶﹐都好努力o甘用佢超級有限公司既英文同姐姐溝通...問姐姐要水要餅去比小寶食...問姐姐小寶點樣有無訓覺....阿爸未必講得好好..但見到佢好努力o甘將佢識既英文搬晒出黎...為左就係想知道多一D 關於小寶既事...

我阿媽仲勁...完全唔識得英文....都好努力o甘用...中文加身體語言同姐姐溝通...真係唔知阿姐姐其實明唔明我阿媽講o羊呢....但佢地又好似溝通到wor... 為左可以叫小寶做動作仔...媽媽仲去學讀英文單字...問我地點讀“ clap hands"(即拍手) ...由完全發錯音到最近完全讀o岩...真係好厲害

而我...仲勁...努力去做一個惡EE....XDDD...最近我開始學緊(其實係逼緊)...無論幾方便幾趕時間幾安全都一定要綠燈先過馬路...試諗下...小寶總有一日自己行...到有一日就會拖住佢出街...要教佢安全地過馬路...教導佢既最好方法係以身作則....um..你咪以為好容易....呢2日我真係試過...當其他人都紅燈過馬路...得你一個企係度等轉燈既時候....真係覺得好 on 居同好有衝動同其他人一齊衝過去架~ 當然最後我無喇.....我都努力中架

本來..我以為2008年最後一篇日記應該係好感性...結果原來唔係

努力迎接2009年喇~~ 我真係希望我唔好再諗太多....希望好既野會降臨我身上^^